ВАЗОРАТИ МАОРИФ ВА ИЛМИ ҶУМҲУРИИ ТОҶИКИСТОН ИТТИЛОЪ МЕДИҲАД, КИ ТИБҚИ ҚАРОРИ ҲУКУМАТИ ҶУМҲУРИИ ТОҶИКИСТОН АЗ 17-УМИ ФЕВРАЛИ СОЛИ 2024, №71 “ДАР БОРАИ ГУЗАРОНИДАНИ РӮЗҲОИ ИСТИРОҲАТ БА ДИГАР РӮЗҲОИ КОРӢ ДАР СОЛИ 2024” РӮЗИ ИСТИРОҲАТ АЗ РӮЗИ ШАНБЕИ 4-УМИ МАЙ БА РӮЗИ 10-УМИ МАЙ ГУЗАРОНИДА ШУДААСТ.
АЗ ИН РӮ, ДАР МУАССИСАҲОИ ТОМАКТАБӢ ВА ЗИНАИ ТАҲСИЛОТИ ИБТИДОИИ МУАССИСАҲОИ ТАҲСИЛОТИ УМУМӢ (СИНФҲОИ 1-4) НОВОБАСТА АЗ ШАКЛҲОИ МОЛИКИЯТ ВА ТОБЕИЯТИ ИДОРАВӢ МАШҒУЛИЯТ ВА ДАРСҲОИ РӮЗИ 10-УМИ МАЙ (ҶУМЪА) БА РӮЗИ ШАНБЕИ 4-УМИ МАЙ ГУЗАРОНИДА ШУДА, РӮЗИ 10-УМИ МАЙИ СОЛИ 2024 ИСТИРОҲАТӢ МЕБОШАД.
БАРОИ ХОНАНДАГОНИ СИНФҲОИ 5-11-И МУАССИСАҲОИ ТАҲСИЛОТИ УМУМӢ ВА ДОНИШҶӮЁНИ МУАССИСАҲОИ ТАҲСИЛОТИ ОЛИИ КАСБӢ ДАРСҲО ТИБҚИ РЕҶАИ МУҚАРРАРӢ ГУЗАРОНИДА МЕШАВАД.

Тавре ки ба ҳамагон маълум аст тибқи фармоиши вазири маориф ва илми Ҷумҳурии Тоҷикистон рӯзҳои 19-21 апрели соли равон дар Муассисаи давлатии таълимии "Мактаби байналмилалии Президентӣ" дар шаҳри Душанбе даври ҷумҳуриявии олимпиадаҳои фаннии хонандагони синфҳои 7-8 баргузор гардид. Дар олимпиадаи мазкур 467 довталаб аз муассисаҳои таълимии шаҳри Душанбе ширкат варзида 254 медал ба даст оварданд, ки аз ин шумора:
17 медали тилло 
50 медали нуқра 
187 медали биринҷи 
Муассисаи давлатии "Маркази дарёфт ва рушди истеъдодҳои назди Сарраёсати маорифи шаҳри Душанбе" дастоварди навбатии толибилмони шаҳри Душанберо ба кулли маорифчиёни пойтахт табрик намуда, минбаъд низ баҳри дар сафи пеш қарор гирифтани дастаи олимпии шаҳри Душанбе саъю кӯшишро ба харҷ медиҳад.

Субҳи имрӯз дар Муассисаи давлатии таълимии «Мактаби байналмилалии президентӣ»-и шаҳри Душанбе марҳилаи чоруми олимпиадаҳои фаннӣ барои хонандагони синфҳои 7-8-и муассисаҳои таҳсилоти умумии кишвар оғоз гардид. Дар олимпиада аз ҳамаи шаҳру ноҳияҳои ҷумҳурӣ хонандагон ширкат варзида, малака, маҳорат ва донишҳои худро муаррифӣ хоҳанд кард.
Дар қисмати ифтитоҳии чорабинӣ муовини вазири маориф ва илми кишвар Зиёдулло Абдулзода, намояндагони сохторҳои маорифи кишвар, хонандагону омӯзгорони мактабҳои таҳсилоти ҳамагонӣ ҳузур доштанд.
Муовини вазири маориф ва илми Ҷумҳурии Тоҷикистон иштирокчиёни марҳилаи ниҳоии олимпиадаро табрику таҳният гуфта, таъкид намуд, ки тарбияи шахсиятҳои эҷодкор ва болаёқат яке аз муҳимтарин вазифаҳои низоми маориф мебошад.
Дар олимпиада 1499 хонанда иштирок намуда, ҷамъбасти он 21-уми апрел дар назар дошта шудааст.

Имрӯз зодрӯзи сардафтари адабиёти муосири тоҷик Садриддин Айнӣ аст. Дар таърихи пешрафту тараққиёти маданияту адабиёти халқи тоҷик Устод Айнӣ шахсияте аст, ки бо асарҳояш хазинаи адабиёти халқи тоҷикро ғанӣ гардонидааст.

Хизматҳои Устод Айнӣ на танҳо дар рушди адабиёти тоҷик, балки дар пешрафти илмҳои адабиётшиносӣ, таърих, ҷомеашиносӣ низ беназир буда, осори ӯ ганҷинаи бебаҳои маънавии миллати тоҷик мебошад. Осори адабӣ ва илмии Садриддин Айнӣ дар куллиёти понздаҳҷилда гирд оварда шудааст.

Барои ҳар фарди бедордил мақом ва мартабаи Устод Айнӣ ва нақши беандозаи ӯ бисёр бузург мебошад. Устод Айнӣ тавонист, ки давоми фаъолият Тоҷикистон ва тоҷиконро ба ҷаҳониён муаррифӣ намояд ва дар таъсис ёфтани Тоҷикистон нақши бузург гузорад. Бешак, «Намунаи адабиёти тоҷик» шаҳодатномаи халқи тоҷик мебошад, ки тавассути ин асари безавол ва ниҳоят арзишманд  тоҷикон тавонистанд ҳастӣ ва ҳувияташонро ҳифз намуда, барои расидан ба Истиқлолияти давлатӣ замина фароҳам оранд. Устод Садриддин Айнӣ ба сифати фарзанди хирадманду заковатпеша, фидокору қаҳрамон бо талошу муборизаҳояш дар шароити  давраи нави таърихӣ номи тоҷиконро вирди забон ва шуҳрати ҷаҳониён гардонид. Дар замони барои тоҷикон тақдирсози садаи 20 Устод Садриддин Айнӣ бо осори гаронбаҳояшон соҳиби аслӣ ва ҳақиқии Ватан будани тоҷиконро дар сарзамини Осиёи Миёна ба таври барҷаста собит намудааст.

Президенти ҷумҳурӣ муҳтарам Эмомалӣ Раҳмон дар маросими баъди навсозӣ ба истифода супоридани Боғи фарҳангу фароғатии ба номи Садриддин Айнӣ 6 ноябри соли 2017 иброз доштанд, ки «корномаи беназири устод дар таърихи миллати мо камназир буда, тамоми умри бобаракати ӯ барои ҳифзи ҳувияти тоҷикон ва ба сифати миллати қадимӣ эътироф гардидани онҳо сарф шудааст. Дар ин хусус худи Устод дар мақолааш бо номи «Тақдири як халқ» навишта буд: «Давоми умри худ ман китобҳои зиёде навиштаам, ки ҳамаи онҳо ба як мавзуъ бахшида шуда, аз як мавод фароҳам омадаанд. Ҳамаи ин китобҳо – дар бораи тоҷикон ва Тоҷикистон, дар бораи мамлакати кӯҳистони ман, дар бораи хоки муқаддас, дар бораи фарзандони ин сарзамин мебошанд, ки дар қарни ҳафт ба худ номи «тоҷик»-ро гирифт».

Устод Айнӣ дар аввали асри ХХ дар мақолаву очеркҳо, шеъру достонҳо ва повесту романҳояш аз таърих, забон, адаб ва ҳунару фарҳанги миллати тоҷик озоду ошкоро дифоъ менамуд ва мардумро ба худшиносӣ даъват мекард.

Устод Садриддин Айнӣ он солҳо беш аз дигарон дар мақолаҳои «Масъалаи тоҷикон», «Дар бораи мактаб ва маорифи тоҷик», «Забони тоҷикӣ», «Дар атрофи забони тоҷикӣ» ба дифои ҳуқуқу ҳастии тоҷикон баромада, қадимӣ, таърихӣ ва бумӣ будани миллаташро исбот намуд. Ӯ ба муқобили иддае аз зиёиёни он рӯзҳо, ки забони тоҷикиро забони кӯҳна мепиндоштанд, баромада, ботил ва беасос будани чунин ақидаҳоро фош мекард ва таъкиду исбот менамуд, ки тоҷикон забони адабии оммафаҳми беш аз ҳазорсола доранд ва он то кунун на танҳо дар муҳити халқи тоҷик, балки дар байни ҳамаи форсизабонони дунё роиҷ мебошад.

Дар андеша ва осори устод Айнӣ масъалаи ташаккули ҳувият ва баланд бардоштани худшиносии миллӣ дар ҷойи аввал қарор дошт. Маҳз аз баракати озодиву соҳибистиқлолии Тоҷикистон доираи васеи хонандагон имкон пайдо намуданд, ки бо китоби басе арзишманди устод Айнӣ «Намунаи адабиёти тоҷик» шинос шаванд.

Бояд гуфт, ки дар солҳои истиқлолияти давлатӣ бузургдошти фарзандони фарзонаи миллат, ки ба хотири истиқлолу озодии Ватан хизмати фидокорона намудаанд, ба яке аз самтҳои муҳими сиёсати фарҳангии мо табдил ёфтааст.

Тавре шоир Бозор Собир навиштааст:

Умри Айнӣ аз барои халқ сарфи хома шуд,
Халқи моро дафтари Айнӣ шаҳодатнома шуд.
Сарзамини мо худ аз осори ӯ сар мешавад,
Ин замин бо ӯ ба дунёе баробар мешавад.

Соли 1997 бо Фармони Президенти Ҷумҳурии Тоҷикистон ба Садриддин Айнӣ  унвони аввалин Қаҳрамони Тоҷикистон дода шуд.

https://khovar.tj/2024/04/umri-ajn-az-baroi-hal-sarfi-homa-shud-sadriddin-ajn-tamomi-umri-bobarakata...

Муассисаи давлатии "Маркази дарёфт ва рушди истеъдодҳои шаҳри Душанбе" иттилоъ медиҳад, ки тибқи натиҷаҳо ва таҳлилҳои маркази миллии тестӣ назди Президенти Ҷумҳурии Тоҷикистон ва маркази ҷумҳуриявии дарёфт ва рушди истеъдодҳо чор ноҳияи пойтахт дар "Даҳгонаи беҳтарин ноҳияҳои фаъол дар ҳаракати олимпии ҷумҳурӣ" шомил гардиданд.
✔ Дастаи олимпии ноҳияи Сино дар ҷойи якум бо гирифтани 64 медал:
- 5 медали тилло 
- 23 медали нуқра 
- 36 медали биринҷӣ 
✔ Дастаи олимпии ноҳияи Исмоили Сомонӣ дар ҷойи сеюм бо гирифтани 20 медал:
- 1 медали тилло 
- 7 медали нуқра 
- 12 медали биринҷӣ
✔ Дастаи олимпии ноҳияи Фирдавсӣ дар ҷойи панҷум бо гирифтани 17 медал:
- 5 медали нуқра 
- 12 медали биринҷи 
✔Дастаи олимпии ноҳияи Шоҳмансур дар ҷойи ҳаштум бо гирифтани 11 медал:
- 1 медали нуқра 
- 10 медали биринҷи

Тавре ки иттилоъ дода будем тибқи фармоиши вазири маориф ва илми Ҷумҳурии Тоҷикистон аз 27 то 31 марти соли равон дар Муассисаи давлатии таълимии "Мактаби байналмилалии Президентӣ" дар шаҳри Душанбе даври ҷумҳуриявии олимпиадаҳои фаннии хонандагони синфҳои 11 баргузор гардид. Дар олимпиадаи мазкур 331 довталаб аз муассисаҳои таълимии шаҳри Душанбе ширкат варзида 112 медал ба даст оварданд, ки аз ин шумора:

✔ 6 медали тилло 

✔36 медали нуқра 

✔70 медали биринҷи 

Муассисаи давлатии "Маркази дарёфт ва рушди истеъдодҳои назди Сарраёсати маорифи шаҳри Душанбе" дастоварди навбатии толибилмони шаҳри Душанберо ба кулли маорифчиёни пойтахт табрик намуда, минбаъд низ баҳри дар сафи пеш қарор гирифтани дастаи олимпии шаҳри Душанбе саъю кӯшишро ба харҷ медиҳад.

Тибқи фармоиши Вазири маориф ва илми Ҷумҳурии Тоҷикистон, дастаи мунтахаби ҷумҳурӣ иборат аз 3 нафар хонанда дар Олимпиадаи байналмилалии Туркманистон ба муносибати ҷашни 300-солагии шоир-мутафаккир Махтумқули Фироқӣ аз фанни математика, ки рӯзҳои 25-30 марти соли 2024 дар шаҳри Ашхободи Ҷумҳурии Туркманистон баргузор гардид, сафарбар карда шуда, сазовори як ҷойи II гардиданд.

– Юсупов Меҳрубон – хонандаи синфи 9 Муассисаи давлатии таълимии «Литсейи Президентӣ барои хонандагони болаёқати Тоҷикистон» дар шаҳри Душанбе ҷойи II;
– Зоиров Анушервон – хонандаи синфи 10 Муассисаи давлатии таълимии «Литсейи Президентӣ барои хонандагони болаёқати Тоҷикистон» дар шаҳри Душанбе;
– Душанов Абдулло – хонандаи синфи 7 Муассисаи давлатии таълимии «Литсейи Президентӣ барои хонандагони болаёқати Тоҷикистон» дар шаҳри Душанбе;

 Бояд гуфт, ки Олимпиада сатҳи баланд буда, дар он 137 нафар иштирокчиён аз 12 кишварҳои Осиё ва Аврупо аз он ҷумла, Ҷумҳурии Мардумии Чин, Россия, Эрон, Булғория, Қазокистон, Белоруссия, Арабистони Саудӣ, Қатар, Озорбайҷон, Ӯзбекистон, Туркманистон ва Тоҷикистон бо ҳам сабқати илмӣ намуданд. 

– Юсупов Меҳрубон – хонандаи синфи 9 Муассисаи давлатии таълимии «Литсейи Президентӣ барои хонандагони болаёқати Тоҷикистон» дар шаҳри Душанбе то ин ҷониб дар 5 Олимпиадаҳои сатҳи баланд аз фанни математика иштирок намуда соҳиби ҷойҳои ифтихорӣ гардидааст.

- Олимпиадаи байналмилалии  «InIMC-2021» ҷойи III дар Ҷумҳурии Индонезия.
- Олимпиадаи байналмилалии «EDUANT-2022» ҷойи I дар Ҷумҳурии Туркия
- Олимпиадаи байналмилалии «JBMO-2023» ҷойи III дар Ҷумҳурии Албания
- Олимпиадаи байналмилалии «BIMC-2023» ҷойи III дар Ҷумҳурии Булғория.
- Олимпиадаи байналмилалӣ ба номи «Махтумқули Фироқӣ» Ҷумҳурии Туркманистон 2024 ҷойи II.
  Ин дастовардро ба кулли омӯзгорону хонандагон ва волидон табрик гуфта ба хонандагон дар оянда боз ҳам мувафаққият таманно менамоем.

Субҳи имрӯз дар Муассисаи давлатии таълимии  «Мактаби байналмилалии Президентӣ» даври ҷумҳуриявии  Олимпиадаҳои фаннӣ барои синфҳои 11 -и муассисаҳои таълимии ҷумҳурӣ  оғоз гардид.
Дар маросими ифтитоҳии чорабинии мазкур вазири маориф ва илми Ҷумҳурии Тоҷикистон Саидзода Раҳим Ҳамро, директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ, роҳбарияти «Маркази ҷумҳуриявии дарёфт ва рушди истеъдодҳо» , инчунин намояндагони дигари илму маорифи кишвар, меҳмонон, хонандагони макотиби миёна ва омӯзгорони муассисаҳои таълимӣ, ки дар ин марҳилаи олимпиада роҳ ёфтаанд, иштирок намуданд.
Зимни суханронӣ вазири маориф ва илми Ҷумҳурии Тоҷикистон Саидзода Раҳим Ҳамро  иброз намуд, ки соҳаи маориф зербинои асосии пешрафти ояндаи давлату миллат буда, маҳз бо дуруст ба роҳ мондани таълиму тарбияи насли наврас метавон ояндаи дурахшони миллатро таъмин намуд.
Сипас, Ҷаъфарзода Сабзалӣ Файзалӣ директори Маркази миллии тестии назди Президенти Ҷумҳурии Тоҷикистон  суханронӣ намуда, таъкид намуд, ки Олимпиада бо дарназардошти таъмини пурраи шаффофият гузаронида шуда, барои назорати пурраи озмунҳо синфхонаҳои имтиҳонӣ бо воситаҳои видеоӣ ва сабт  таъмин карда шудаанд.
Бояд гуфт , ки дар даври ҷумҳуриявии Олимпиадаи фаннӣ то 31 марти соли 2024 идома ёфта, дар он дар умум 1127 нафар хонандагони синфҳои 11-и муассисаҳои таълимии кишвар иштирок намуда, давоми 4 рӯз дар ду самт донишҳои илмии худро месанҷанд.
Зикр бояд кард, ки даври ҷумҳуриявии олимпиадаи фаннӣ, ки аз ҷониби МД «Маркази ҷумҳуриявии дарёфт ва рушди истеъдодҳо» ташкил карда шуд, минбари дарёфт ва рушди тафаккури илмии истеъдодҳои наврас дар байни хонандагони муассисаҳои таълимии кишвар хоҳад буд.  Ҳадаф аз баргузории Олимпиадаи фаннӣ ин ба ҳам овардани хонандагони болаёқат аз тамоми манотиқи кишвар буда,  муайян, муаррифӣ ва дастгирии маънавии онҳо дар сатҳи ҷумҳурӣ ба ҳисоб меравад.

Аз 21 то 31 март тамоми хонандагони муассисаҳои таҳсилоти миёнаи умумии мамлакат ба  таътили баҳорӣ мебароянд ва чоряки сеюми таҳсил ҷамъбаст мешавад, иттилоъ доданд аз маркази матбуоти Вазорати маориф ва илми Ҷумҳурии Тоҷикистон.

Таътили баҳорӣ танҳо ба хонандагон дахл дошта, омӯзгорон дар ин муддат ба корҳои методӣ ва гузаронидани маҷлисҳои падару модарон, суҳбат бо волидайни хонандагон ва чорабиниҳои таълимӣ ҷалб мешаванд. Инчунин ба хонандагон рӯйхати китобҳо тавсия мешавад, то дар таътили баҳорӣ онҳоро мутолиа намоянд.

Иброз гардид, ки Вазорати маориф ва илми Ҷумҳурии Тоҷикистон  барои дар руҳияи хештаншиносӣ ва ватанпарварӣ тарбия намудани насли наврас ҳамеша корҳои муфид ва барномаҳои тарбиявӣ амалӣ месозад.

Масъулини соҳаи маориф иброз медоранд, ки падару модарон ва роҳбарони синфҳо бояд саёҳат ташкил намуда, бачаҳоро  ба тамошои  ҷойҳои таърихӣ ва осорхонаҳо  баранд. Ҳамчунин роҳбарони синфҳо байни шогирдон сабқатҳои гуногуни шавқовар ороста, бояд оид ба муҳтавои китобҳои хондаашон суҳбат гузаронанд.

Инчунин ба хонандагон тавсия дода мешавад, ки дар давраи таътили баҳорӣ  бештар  ба  мутолиаи  асарҳои бадеӣ  машғул шуда, дониш ва ҷаҳонбинии маънавиашонро васеъ намоянд.