6 нафар хонандагони синфҳои 7-9-и мамлакат дар 28-умин Олимпиадаи байналмилалии математикии наврасони Балкан «JBMO-2024» аз фанни математика иштирок намуда, сазовори ҷойҳои ифтихорӣ гардиданд.
Олимпиадаи мазкур аз 25 то 30 июни соли 2024 дар шаҳри Анталияи Ҷумҳурии Туркия баргузор шуда, дар он наврасони зиёда аз 20 давлати дунё иштирок намуданд. Дастаи мунтахаби Ҷумҳурии Тоҷикистонро дар ин Олимпиадаи бонуфузи байналмилалӣ 6 нафар хонанда намояндагӣ намуд. Хушбахтона, ҳамаи хонандагони тоҷик тавонистанд дар ин сабқати илмии байналмилалӣ шарафи ҷумҳуриро баланд бардошта, сазовори 6 ҷойи ифтихорӣ гарданд.
Ин дастовард шаҳодати он аст, ки рушди ҳаракати олимпӣ дар кишвар сол ба сол беҳтар гардида, хонандагони тоҷик аз фанҳои табиӣ-риёзӣ бо давлатҳои тараққикардаи дунё рақобати арзанда нишон дода, нуфузи кишварро дар арсаи ҷаҳонӣ баланд мебардоранд. Дар Олимпиада, аз ҷумла, аз Фаронса, Туркия, Хорватия, Сербия, Албания, Руминия, Македония, Югославия, Босния ва Герсоговина, Черногория, Молдавия, Юнон, Арабистони Саудӣ, Тоҷикистон, Қазоқистон, Қирғизистон, Туркманистон, Булғористон, Озарбойҷон, Филиппин, Кипр ва ғ. дар ҳайати як дастаи иборат аз 6 нафар хонандагони синфҳои 7-9 (то 15-сола) иштирок намуданд.

Аз санаи 27 то 30 майи соли ҷорӣ дар шаҳри Тошкенти Ҷумҳурии Ӯзбекистон 2-юмин Олимпиадаи байналмилалии Ал-Хоразмӣ аз фанни математика байни наврасон бо фарогири 140 иштирокчи аз 6 давлатҳои ИДМ бо ҳам сабқати илмӣ намуданд.

Дар ин Олимпиадаи сатҳи баланд мунтахаби Ҷумҳурии Тоҷикистонро 12 нафар наврас аз муассисаҳои таълимии кишвар муаррифӣ намуда, сазовори 9 ҷойи ифтихорӣ, 1 ҷойи I, 2 ҷойи II ва 6 ҷойи III гардиданд.

Хушбахтона хонандаи синфи 9-уми МДТ "Литсейи президентӣ барои хонандагони болаёқати Тоҷикистон" ЮСУПОВ МЕҲРУБОН сазовори ҷойи 1-ум гардид.
Аз номи ҷомеаи меҳнатии литсей ба Меҳрубон Юсупов, ба муаллим Баротов Ҷонибек ва падару модари онҳо изҳори сипос баён менамоем ва ин дастовардро ба кулли хонандагону омӯзгорон, падару модарон ва нафароне, ки ба илм таваҷҷуҳ доранд, муборак бод мегӯем.
Инчунин, миннатдории коллективи омӯзгорони литсейро ба сарпарасти муассиса-Президенти Ҷумҳурии Тоҷикистон муҳтарам Эмомалӣ Раҳмон барои шароитҳои муҳайёгардонидаашон ҷаҳони сипос баён менамоем.

Дастаи 12-нафараи мактаббачагони боистеъдод аз Ҷумҳурии Тоҷикистон дар Олимпиадаи байналмилалии TASIMO, ки рӯзҳои 18-20 майи соли 2024 дар шаҳри Тошканди Ӯзбекистон баргузор шуд, бомуваффақият иштирок карданд. Чорабинии мазкур 300 нафар иштирокчиёнро аз 10 кишвар гирд оварда, ба майдони намоиши қобилиятҳои барҷастаи риёзии нобиғаҳои наврас табдил ёфт.
Дастаи мунтахаби Ҷумҳурии Тоҷикистон дар ин сабқати зеҳнӣ сазовори се мақоми ифтихорӣ гардид. Ин муваффақияти барҷаста на танҳо боиси ифтихор, балки тасдиқи қобилияти барҷастаи риёзй ва эътиқоди қавии шуури наврасони тоҷик хоҳад буд.
Ғолибони Олимпиадаи байналмилалии TASIMO аз Ҷумҳурии Тоҷикистон инҳо мебошанд:
1. Душанов Азамат хонандаи синфи 11-и Литсейи Президентӣ барои хонандагони болаёқати Тоҷикистон, ҷойи II;
Дар баробари ба даст овардани ҷоизаҳо, наврасони тоҷик дар байни ҷомеаи ҷаҳонии риёзӣ соҳиби эҳтиром ва эътироф гардиданд. Муваффақиятҳои онҳо сатҳи баланди таҳсил дар Тоҷикистонро нишон дода, барои наслҳои ояндаи риёзидонҳо намунаи воқеӣ хоҳад буд.
Бояд гуфт, ки баргузории ин чорабинӣ на танҳо ба рушди илмии иштирокчиён мусоидат намуд, балки як қадами муҳим дар таҳкими робитаҳои фарҳангӣ ва маърифатии байни кишварҳо гардид.

Муассисаи давлатии «Маркази дарёфт ва рушди истеъдодҳои шаҳри Душанбе»- ба диққати директорон, омӯзгорон ва хонандагони муассисаҳои таҳсилоти умумии пойтахт мерасонад, ки рӯзҳои 19-21 апрели соли 2024 даври чоруми (ҷумҳуриявӣ) олимпиадаҳои фаннӣ барои наврасон аз фанҳои ҷамъиятӣ-гуманитарӣ ва табиӣ-риёзӣ (синфҳои 7-8) дар Муассисаи таълимии давлатии «Мактаби байналмилалии Президентӣ» дар шаҳри Душанбе ташкил ва баргузор мегардад.

Талабот:
Иштирокчиёни олимпиадаҳои фаннӣ бо либоси мактабӣ, нусхаи шаҳодатномаи таваллуд ва маълумотномаи бо расм ва муҳри муассисаи таълимӣ тасдиқшуда ба Олимпиада роҳ дода мешаванд.

Кумитаи тадорукот!
Суроға: н.Сино, кӯчаи Карамов 101

Вазорати маориф ва илми Ҷумҳурии Тоҷикистон
Маркази ҷумҳуриявии дарёфт ва рушди истеъдодҳо

Бо пайгирӣ аз сиёсати маорифпарваронаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо дастгирии Мақомоти иҷроияи ҳокимияти давлатии шаҳри Душанбе аз ҷониби Муассисаи давлатии “Маркази дарёфт ва рушди истеъдодҳои назди Сарраёсати маорифи шаҳри Душанбе 7 майи соли 2024 дар “Кохи Суруш” маросими ҷоизасупории ғолибони даври сеюми (шаҳрӣ) олимпиадаҳои фаннӣ, олимпиадаи даставии “Истеъдод”, олимпиада оид ба “Шоҳмот” ва “Spelling bee” баргузор гардид.
Дар маросими мазкур муовини Раиси шаҳри Душанбе, сарпарасти соҳа Одилзода Дилбар Раҳим, сардори Сарраёсати маорифи шаҳри Душанбе Исмоилзода Баҳром Мансур ва масъулини сохторҳои маорифи пойтахт иштирок намуданд.
Ташкили озмуну олимпиадаҳо яке аз воситаҳои муҳими дарёфти хонандагони боистеъдод ва лаёқатманд буда, дар ин самт бо дастгирии бевоситаи Раиси шаҳри Душанбе муҳтарам Рустами Эмомалӣ тадбирҳои судманду муассир амалӣ гардида, то рафт дар пойтахт ҳаракати олимпии хонандагон вусъат ва шумораи бештари хонандагонро фаро гирифта истодааст.
Танҳо дар ҳамин сол дар пойтахт 8 намуд олимпиадаҳои гуногуни фаннӣ ва зеҳнӣ бо ҷалби зиёда аз 5000 хонандагони синфҳои 5-11 баргузор гардиданд, ки ин нишондод аз солҳои қаблӣ ба маротиб бештар аст. Дар ин сабқатҳо аз чор ноҳияи пойтахт 5202 нафар иштирок намуда, аз ин шумора 1206 нафарашон сазовори ҷойҳои ифтихорӣ гардиданд, ки 188 нафари онҳо хонандагони синфҳои 11-ум мебошанд. Ҷамъбаст ва натиҷагирии даври сеюми олимпиадаҳои фаннии хонандагон нишон дод, ки ноҳияи Сино бо гирифтани 599 ҷойи ифтихорӣ мақоми аввал, ноҳияи Фирдавсӣ бо гирифтани 223 ҷойи ифтихорӣ мақоми ҷойи дуюм, ноҳияи Исмоили Сомонӣ ва Шоҳмансур бо гирифтани 218 ҷойи ифтихорӣ мақоми сеюмро ишғол намуданд.
Маросими ҷоизасупории ғолибони даври сеюми (шаҳрӣ) олимпиадаҳои фаннӣ аз рӯйи 12 номинатсия: “Мақомотҳои иҷроияи ҳокимияти давлатии фаъол дар самти ҳаракати олимпӣ", “Шуъбаҳои маорифи фаъол дар самти ҳаракати олимпӣ”, “Даҳгонаи муассисаҳои таҳсилоти типи нав дар самти ҳаракати олимпӣ”, “Даҳгонаи беҳтарин муассисаҳои таҳсилоти миёнаи умумӣ дар самти ҳаракати олимпӣ”, “Ноҳияи фаъол дар самти ҳаракати олимпӣ”, “Марказҳои дарёфт ва рушди истеъдодҳои дар самти ҳаракати олимпӣ фаъоли пойтахт”, “Беҳтарин дастаи муассисаҳои таҳсилоти миёнаи умумӣ дар олимпиадаи даставии «Истеъдод»”, “Беҳтарин дастаи муассисаҳои таҳсилоти типи нав дар олимпиадаи даставии «Истеъдод»”, “Беҳтарин дастаи шоҳмотбозони пойтахт”, “Беҳтарин дастаи муассисаҳои таҳсилоти миёнаи умумӣ дар олимпиадаи «Spelling Bee»”, “Беҳтарин дастаи муассисаҳои таҳсилоти типи нави олимпиадаи «Spelling Bee»”, “Ғолибони даври сеюми (шаҳрӣ) олимпиадаҳои фаннӣ” баргузор гардид.
Боиси хушнудиву фараҳмандии мост, ки имрӯз 248 нафар хонандагони муассисаҳои таълимии шаҳри Душанбе, ки ҷойҳои фахриии олимпиадаҳои фанниро сазовор гардиданд, қадрдонӣ гардиданд.
Боиси тазаккур аст, ки имрӯз наврасони пойтахт бо вуҷуди ҳанӯз хурдсол буданашон дар озмуну олимпиадаҳои байналмилалӣ ширкат намуда, бо дастовардҳои илмиву эҷодии худ имконияту қобилияти фарзандони Тоҷикистонро дар миёни кишварҳои дигар ба таври шоиста муаррифӣ менамоянд.
Маркази матбуотии Сарраёсати маорифи шаҳри Душанбе

ВАЗОРАТИ МАОРИФ ВА ИЛМИ ҶУМҲУРИИ ТОҶИКИСТОН ИТТИЛОЪ МЕДИҲАД, КИ ТИБҚИ ҚАРОРИ ҲУКУМАТИ ҶУМҲУРИИ ТОҶИКИСТОН АЗ 17-УМИ ФЕВРАЛИ СОЛИ 2024, №71 “ДАР БОРАИ ГУЗАРОНИДАНИ РӮЗҲОИ ИСТИРОҲАТ БА ДИГАР РӮЗҲОИ КОРӢ ДАР СОЛИ 2024” РӮЗИ ИСТИРОҲАТ АЗ РӮЗИ ШАНБЕИ 4-УМИ МАЙ БА РӮЗИ 10-УМИ МАЙ ГУЗАРОНИДА ШУДААСТ.
АЗ ИН РӮ, ДАР МУАССИСАҲОИ ТОМАКТАБӢ ВА ЗИНАИ ТАҲСИЛОТИ ИБТИДОИИ МУАССИСАҲОИ ТАҲСИЛОТИ УМУМӢ (СИНФҲОИ 1-4) НОВОБАСТА АЗ ШАКЛҲОИ МОЛИКИЯТ ВА ТОБЕИЯТИ ИДОРАВӢ МАШҒУЛИЯТ ВА ДАРСҲОИ РӮЗИ 10-УМИ МАЙ (ҶУМЪА) БА РӮЗИ ШАНБЕИ 4-УМИ МАЙ ГУЗАРОНИДА ШУДА, РӮЗИ 10-УМИ МАЙИ СОЛИ 2024 ИСТИРОҲАТӢ МЕБОШАД.
БАРОИ ХОНАНДАГОНИ СИНФҲОИ 5-11-И МУАССИСАҲОИ ТАҲСИЛОТИ УМУМӢ ВА ДОНИШҶӮЁНИ МУАССИСАҲОИ ТАҲСИЛОТИ ОЛИИ КАСБӢ ДАРСҲО ТИБҚИ РЕҶАИ МУҚАРРАРӢ ГУЗАРОНИДА МЕШАВАД.

Тавре ки ба ҳамагон маълум аст тибқи фармоиши вазири маориф ва илми Ҷумҳурии Тоҷикистон рӯзҳои 19-21 апрели соли равон дар Муассисаи давлатии таълимии "Мактаби байналмилалии Президентӣ" дар шаҳри Душанбе даври ҷумҳуриявии олимпиадаҳои фаннии хонандагони синфҳои 7-8 баргузор гардид. Дар олимпиадаи мазкур 467 довталаб аз муассисаҳои таълимии шаҳри Душанбе ширкат варзида 254 медал ба даст оварданд, ки аз ин шумора:
17 медали тилло 
50 медали нуқра 
187 медали биринҷи 
Муассисаи давлатии "Маркази дарёфт ва рушди истеъдодҳои назди Сарраёсати маорифи шаҳри Душанбе" дастоварди навбатии толибилмони шаҳри Душанберо ба кулли маорифчиёни пойтахт табрик намуда, минбаъд низ баҳри дар сафи пеш қарор гирифтани дастаи олимпии шаҳри Душанбе саъю кӯшишро ба харҷ медиҳад.

Субҳи имрӯз дар Муассисаи давлатии таълимии «Мактаби байналмилалии президентӣ»-и шаҳри Душанбе марҳилаи чоруми олимпиадаҳои фаннӣ барои хонандагони синфҳои 7-8-и муассисаҳои таҳсилоти умумии кишвар оғоз гардид. Дар олимпиада аз ҳамаи шаҳру ноҳияҳои ҷумҳурӣ хонандагон ширкат варзида, малака, маҳорат ва донишҳои худро муаррифӣ хоҳанд кард.
Дар қисмати ифтитоҳии чорабинӣ муовини вазири маориф ва илми кишвар Зиёдулло Абдулзода, намояндагони сохторҳои маорифи кишвар, хонандагону омӯзгорони мактабҳои таҳсилоти ҳамагонӣ ҳузур доштанд.
Муовини вазири маориф ва илми Ҷумҳурии Тоҷикистон иштирокчиёни марҳилаи ниҳоии олимпиадаро табрику таҳният гуфта, таъкид намуд, ки тарбияи шахсиятҳои эҷодкор ва болаёқат яке аз муҳимтарин вазифаҳои низоми маориф мебошад.
Дар олимпиада 1499 хонанда иштирок намуда, ҷамъбасти он 21-уми апрел дар назар дошта шудааст.

Имрӯз зодрӯзи сардафтари адабиёти муосири тоҷик Садриддин Айнӣ аст. Дар таърихи пешрафту тараққиёти маданияту адабиёти халқи тоҷик Устод Айнӣ шахсияте аст, ки бо асарҳояш хазинаи адабиёти халқи тоҷикро ғанӣ гардонидааст.

Хизматҳои Устод Айнӣ на танҳо дар рушди адабиёти тоҷик, балки дар пешрафти илмҳои адабиётшиносӣ, таърих, ҷомеашиносӣ низ беназир буда, осори ӯ ганҷинаи бебаҳои маънавии миллати тоҷик мебошад. Осори адабӣ ва илмии Садриддин Айнӣ дар куллиёти понздаҳҷилда гирд оварда шудааст.

Барои ҳар фарди бедордил мақом ва мартабаи Устод Айнӣ ва нақши беандозаи ӯ бисёр бузург мебошад. Устод Айнӣ тавонист, ки давоми фаъолият Тоҷикистон ва тоҷиконро ба ҷаҳониён муаррифӣ намояд ва дар таъсис ёфтани Тоҷикистон нақши бузург гузорад. Бешак, «Намунаи адабиёти тоҷик» шаҳодатномаи халқи тоҷик мебошад, ки тавассути ин асари безавол ва ниҳоят арзишманд  тоҷикон тавонистанд ҳастӣ ва ҳувияташонро ҳифз намуда, барои расидан ба Истиқлолияти давлатӣ замина фароҳам оранд. Устод Садриддин Айнӣ ба сифати фарзанди хирадманду заковатпеша, фидокору қаҳрамон бо талошу муборизаҳояш дар шароити  давраи нави таърихӣ номи тоҷиконро вирди забон ва шуҳрати ҷаҳониён гардонид. Дар замони барои тоҷикон тақдирсози садаи 20 Устод Садриддин Айнӣ бо осори гаронбаҳояшон соҳиби аслӣ ва ҳақиқии Ватан будани тоҷиконро дар сарзамини Осиёи Миёна ба таври барҷаста собит намудааст.

Президенти ҷумҳурӣ муҳтарам Эмомалӣ Раҳмон дар маросими баъди навсозӣ ба истифода супоридани Боғи фарҳангу фароғатии ба номи Садриддин Айнӣ 6 ноябри соли 2017 иброз доштанд, ки «корномаи беназири устод дар таърихи миллати мо камназир буда, тамоми умри бобаракати ӯ барои ҳифзи ҳувияти тоҷикон ва ба сифати миллати қадимӣ эътироф гардидани онҳо сарф шудааст. Дар ин хусус худи Устод дар мақолааш бо номи «Тақдири як халқ» навишта буд: «Давоми умри худ ман китобҳои зиёде навиштаам, ки ҳамаи онҳо ба як мавзуъ бахшида шуда, аз як мавод фароҳам омадаанд. Ҳамаи ин китобҳо – дар бораи тоҷикон ва Тоҷикистон, дар бораи мамлакати кӯҳистони ман, дар бораи хоки муқаддас, дар бораи фарзандони ин сарзамин мебошанд, ки дар қарни ҳафт ба худ номи «тоҷик»-ро гирифт».

Устод Айнӣ дар аввали асри ХХ дар мақолаву очеркҳо, шеъру достонҳо ва повесту романҳояш аз таърих, забон, адаб ва ҳунару фарҳанги миллати тоҷик озоду ошкоро дифоъ менамуд ва мардумро ба худшиносӣ даъват мекард.

Устод Садриддин Айнӣ он солҳо беш аз дигарон дар мақолаҳои «Масъалаи тоҷикон», «Дар бораи мактаб ва маорифи тоҷик», «Забони тоҷикӣ», «Дар атрофи забони тоҷикӣ» ба дифои ҳуқуқу ҳастии тоҷикон баромада, қадимӣ, таърихӣ ва бумӣ будани миллаташро исбот намуд. Ӯ ба муқобили иддае аз зиёиёни он рӯзҳо, ки забони тоҷикиро забони кӯҳна мепиндоштанд, баромада, ботил ва беасос будани чунин ақидаҳоро фош мекард ва таъкиду исбот менамуд, ки тоҷикон забони адабии оммафаҳми беш аз ҳазорсола доранд ва он то кунун на танҳо дар муҳити халқи тоҷик, балки дар байни ҳамаи форсизабонони дунё роиҷ мебошад.

Дар андеша ва осори устод Айнӣ масъалаи ташаккули ҳувият ва баланд бардоштани худшиносии миллӣ дар ҷойи аввал қарор дошт. Маҳз аз баракати озодиву соҳибистиқлолии Тоҷикистон доираи васеи хонандагон имкон пайдо намуданд, ки бо китоби басе арзишманди устод Айнӣ «Намунаи адабиёти тоҷик» шинос шаванд.

Бояд гуфт, ки дар солҳои истиқлолияти давлатӣ бузургдошти фарзандони фарзонаи миллат, ки ба хотири истиқлолу озодии Ватан хизмати фидокорона намудаанд, ба яке аз самтҳои муҳими сиёсати фарҳангии мо табдил ёфтааст.

Тавре шоир Бозор Собир навиштааст:

Умри Айнӣ аз барои халқ сарфи хома шуд,
Халқи моро дафтари Айнӣ шаҳодатнома шуд.
Сарзамини мо худ аз осори ӯ сар мешавад,
Ин замин бо ӯ ба дунёе баробар мешавад.

Соли 1997 бо Фармони Президенти Ҷумҳурии Тоҷикистон ба Садриддин Айнӣ  унвони аввалин Қаҳрамони Тоҷикистон дода шуд.

https://khovar.tj/2024/04/umri-ajn-az-baroi-hal-sarfi-homa-shud-sadriddin-ajn-tamomi-umri-bobarakata...