Санаи 26 майи соли 2023 дар Муассисаи таълимии давлатии “Литсей-интернати Президентӣ барои кӯдакони болаёқати Ҷумҳурии Тоҷикистон” дар шаҳри Душанбе даври ҷумҳуриявии олимпиадаҳои фанҳои ҷамъиятӣ-гуманитарӣ ва фанҳои табиӣ-риёзӣ миёни хонандагони синфҳои 9-10-и муассисаҳои таҳсилоти умумии кишвар оғоз гардид. Дар он муовини вазири маориф ва илми Ҷумҳурии Тоҷикистон Зиёдулло Абдулзода, директори Маркази ҷумҳуриявии дарёфт ва рушди истеъдодҳо Нусратулло Саломиён, намояндагони раёсату шуъбаҳои маориф, омӯзгорону волидон ва хонандагон иштирок намуданд.
Зимни сухани ифтитоҳӣ Зиёдулло Абдулзода иброз дошт, ки соҳаи маориф дар сиёсати Ҳукумати Ҷумҳурии Тоҷикистон афзалиятнок пазируфта шудааст. Яке аз ҳадафҳое, ки Вазорати маориф ва илми Ҷумҳурии Тоҷикистон пеш гирифтааст, баланд бардоштани сифати таҳсилот, рушди ҳаракати олимпӣ ва дар ин замина омода намудани кадрҳои боистеъдод барои бозори меҳнати дохилӣ ва байналмилалӣ мебошад. Баргузории олимпиадаҳои фаннӣ барои баланд бардоштани рӯҳия ва масъулияти хонандагон саҳми арзандаи худро расонида, баҳри рушди соҳаи маориф замина фароҳам меорад.
Сипас вобаста ба суолҳои иштирокчиён директори Маркази ҷумҳуриявии дарёфт ва рушди истеъдодҳо Нусратулло Саломиён баромад карда, хонандагонро бо шартҳо ва тартиби баргузории олимпиада шинос намуд.
Баъди маросими ифтитоҳӣ хонандагон вобаста ба фанҳо ба гурӯҳҳо ҷудо шуда, донишу маҳорати худро нишон дода истодаанд.
Маврид ба зикр аст, ки дар олимпиадаи мазкур 2200 нафар хонандагони синфҳои 9-10 аз муассисаҳои таҳсилоти умумӣ аз фанҳои ҷамъиятӣ-гуманитарӣ (забон ва адабиёти тоҷик, забони русӣ, забони давлатӣ, забони англисӣ, ҳуқуқ, таърих) ва фанҳои табиӣ-риёзӣ (математика, физика, биология, география ва химия) иштирок намуда истодаанд.
Натиҷаи олимпиада санаи 28 май эълон мегардад.

Маркази матбуоти
Вазорати маориф ва илми
Ҷумҳурии Тоҷикистон

Санаи 25.05.2023 дар Тоҷикистон машғулияти таълимӣ дар муассисаҳои таҳсилоти умумӣ, новобаста аз шакли ташкилию ҳуқуқӣ барои хонандагони синфи 1-ум ба анҷом мерасад. Дар ин хусус аз матбуоти Вазорати маориф ва илми Ҷумҳурии Тоҷикистон хабар доданд.

Машғулияти таълимӣ барои хонандагони синфҳои 2-11   1 июни соли 2023 ба анҷом мерасад.

Тибқи иттилои манбаъ, бо мақсади анҷом ёфтани соли таҳсили 2022-2023   фармоиши Вазири маориф ва илми Ҷумҳурии Тоҷикистон «Оид ба анҷоми соли таҳсили 2022-2023, аттестатсияи аз синф ба синф гузаронидан ва хатм дар муассисаҳои таҳсилоти умумии Ҷумҳурии Тоҷикистон» ба тасвиб расид.

Аттестатсияи аз синф ба синф гузаронидани хонандагони синфҳои 4-8 ва 10-и муассисаҳои таҳсилоти умумӣ (рӯзона) аз 3 то 10 июн, инчунин аттестатсияи хатми синфҳои 9-и муассисаҳои таҳсилотӣ аз 3 то 15 июн ва аттестатсияи хатми синфҳои 11-и муассисаҳои таҳсилоти умумӣ аз 3 то 20 июн гузаронида мешавад.

Аз 19-ум то 21-уми майи соли равон дар Муассисаи давлатии таълимии «Литсей-интернати президентӣ барои кӯдакони болаёқати Ҷумҳурии Тоҷикистон» дар шаҳри Душанбе даври ҷумҳуриявии олимпиадаи фаннӣ барои хонандагони синфҳои 7-8 аз фанҳои табиӣ-риёзӣ ва ҷамъиятӣ-гуманитарӣ аз ҷониби Муассисаи давлатии “Маркази ҷумҳуриявии дарёфт ва рушди истеъдодҳо”-и назди Вазорати маориф ва илми Ҷумҳурии баргузор гардид.
Дар олимпиадаи мазкур аз тамоми шаҳру ноҳияҳои ҷумҳурӣ 2576 нафар хонандагони синфҳои 7-8 иштирок намуданд, ки нисбат ба соли гузашта 869 нафар зиёд мебошад. Аз ин шумораи иштирокчиён 943 нафар сазовори ҷойи ифтихорӣ (48 нафар сазовори медали тилло, 194 нафар сазовори медали нуқра ва 701 нафар сазовори медали биринҷӣ) гардиданд.
Натиҷаи ҷамъбасти даври ҷумҳуриявии олимпиадаи фаннӣ барои хонандагони синфҳои 7-8-и муассисаҳои таҳсилоти умумии шаҳру ноҳияҳои ҷумҳурӣ аз фанҳои табиӣ–риёзӣ ва ҷамъиятӣ-гуманитарӣ нишон дод, ки хонандагони шаҳри Душанбе сазовори 375 ҷойи ифтихорӣ (40 медали тилло, 110 медали нуқра ва 225 медали биринҷӣ), вилояти Суғд 249 ҷойи ифтихорӣ (4 медали тилло, 43 медали нуқра ва 202 медали биринҷӣ), вилояти Хатлон 211 ҷойи ифтихорӣ (27 медали нуқра ва 184 медали биринҷӣ), шаҳру ноҳияҳои тобеи ҷумҳурӣ 70 ҷойи ифтихорӣ (3 медали тилло, 5 медали нуқра ва 62 медали биринҷӣ) ва Вилояти Мухтори Кӯҳистони Бадахшон 38 ҷойи ифтихорӣ (1 медали тилло, 9 медали нуқра ва 28 медали биринҷӣ) гардиданд.
Дар натиҷа хонандагони ноҳияи Сино бо гирифтани 243 ҷойи ифтихорӣ (29 медали тилло, 82 медали нуқра ва 128 медали биринҷӣ) сазовори ҷойи якум, ноҳияи Бобоҷон Ғафуров бо гирифтани 52 ҷойи ифтихорӣ (14 медали нуқра ва 38 медали биринҷӣ) сазовори ҷойи дуюм ва шаҳри Хуҷанд бо гирифтани 46 ҷойи ифтихорӣ (3 медали тилло, 9 медали нуқра ва 34 медали биринҷӣ) гардиданд. Хонандагони ноҳияҳои Балҷувон, Ванҷ, Кӯҳистони Мастчоҳ, Мурғоб, Н. Хусрав, Панҷ, Роғун, Тоҷикобод, Файзобод, Ховалинг, Хуросон, Ш. Шоҳин ва Шаҳритус иштирок намуда, мутаасифона, сазовори ягон ҷойи ифтихорӣ нагардиданд. Хонандагони ноҳияҳои Нуробод ва Сангвор дар олимпиада иштирок накарданд.

Маркази матбуоти
Вазорати маориф ва илми
Ҷумҳурии Тоҷикистон

19 майи соли ҷорӣ дар Муассисаи таълимии давлатии “Литсей-интернати Президентӣ барои кӯдакони болаёқати Ҷумҳурии Тоҷикистон” дар шаҳри Душанбе даври ҷумҳуриявии олимпиадаҳои фанҳои ҷамъиятӣ-гуманитарӣ ва фанҳои табиӣ-риёзӣ миёни хонандагони синфҳои 7-8-и муассисаҳои таҳсилоти умумии кишвар оғоз гардид. Дар он муовини вазири маориф ва илми Ҷумҳурии Тоҷикистон Зиёдулло Абдулзода, директори Маркази ҷумҳуриявии дарёфт ва рушди истеъдодҳо Нусратулло Саломиён, намояндагони раёсату шуъбаҳои маориф, омӯзгорону волидон ва хонандагон иштирок намуданд.
Нахуст Зиёдулло Абдулзода иброз дошт, ки соҳаи маориф дар сиёсати Ҳукумати Ҷумҳурии Тоҷикистон афзалиятнок пазируфта шудааст. Яке аз ҳадафҳое, ки Вазорати маориф ва илми Ҷумҳурии Тоҷикистон пеш гирифтааст, баланд бардоштани сифати таҳсилот, рушди ҳаракати олимпӣ ва дар ин замина омода намудани кадрҳои боистеъдод барои бозори меҳнати дохилӣ ва байналмилалӣ мебошад. Баъди суханронӣ бо ибтикори муовини вазири маориф ва илм ҳозирин суруди миллиро хонданд, ки кушодашавии олимпиадаро фазои ватандориву ватандӯстӣ бахшид.
Сипас, вобаста ба суолҳои иштирокчиён директори Маркази ҷумҳуриявии дарёфт ва рушди истеъдодҳо Нусратулло Саломиён баромад карда, хонандагонро бо шартҳо ва тартиби баргузории олимпиада шинос намуд.
Баъди маросими ифтитоҳӣ хонандагон вобаста ба фанҳо ба гурӯҳҳо ҷудо шуда, донишу маҳорати худро нишон дода истодаанд.
Маврид ба зикр аст, ки дар олимпиадаи мазкур 2400 нафар хонандагони синфҳои 7-8 аз муассисаҳои таҳсилоти умумӣ аз фанҳои ҷамъиятӣ-гуманитарӣ (забон ва адабиёти тоҷик, забони русӣ, забони давлатӣ, забони англисӣ, ҳуқуқ, таърих) ва фанҳои табиӣ-риёзӣ (математика, физика, биология, география ва химия) иштирок намуда истодаанд.
Натиҷаи олимпиада санаи 21-уми май эълон мегардад.

Маркази матбуоти
Вазорати маориф ва илми
Ҷумҳурии Тоҷикистон

Рӯзҳои 13-ум ва 14-уми майи соли равон аз ҷониби Муассисаи давлатии “Маркази ҷумҳуриявии дарёфт ва рушди истеъдодҳо”-и назди Вазорати маориф ва илми Ҷумҳурии Тоҷикистон дар Муассисаи давлатии таълимии «Мактаби Президентӣ барои кӯдакони болаёқат» дар шаҳри Ҳисор даври ҷумҳуриявии олимпиадаҳои фаннӣ барои синфҳои 5-6 аз фанҳои табиӣ-риёзӣ (аз фанни математика, аз фанни биология, аз фанни география ва аз фанни технологияи иттилоотӣ) баргузор гардид.
Дар олимпиадаҳои мазкур 726 нафар хонандагони синфҳои 5-6-и муассисаҳои таҳсилоти умумии ҷумҳурӣ фаъолона иштирок намуданд. Дар озмун 179 нафар хонандагон сазовори ҷойҳои ифтихорӣ (3 нафар сазовори медали тилло, 32 нафар сазовори медали нуқра ва 144 нафар сазовори медали биринҷӣ) гардиданд.
Натиҷаи ҷамбасти даври ҷумҳуриявии олимпиадаҳои фаннӣ барои хонандагони синфҳои 5-6-и муассисаҳои таҳсилоти умумии шаҳру ноҳияҳои ҷумҳурӣ аз фанҳои табиӣ - риёзӣ нишон дод, ки хонандагони вилояти Суғд сазовори 67 ҷойи ифтихорӣ (5 медали нуқра ва 62 медали биринҷӣ), шаҳри Душанбе сазовори 58 ҷойи ифтихорӣ (2 медали тилло, 17 медали нуқра ва 39 медали биринҷӣ), вилояти Хатлон сазовори 34 ҷойи ифтихорӣ (7 медали нуқра ва 27 медали биринҷӣ), шаҳру ноҳияҳои тобеи ҷумҳурӣ сазовори 15 ҷойи ифтихорӣ (3 медали нуқра ва 12 медали биринҷӣ) ва Вилояти Мухтори Кӯҳистони Бадахшон сазовори 5 ҷойи ифтихорӣ (1 медали тилло ва 4 медали биринҷӣ) гардиданд.
Ҷамъбасти озмун маълум намуд, ки хонандагони ноҳияи Сино бо гирифтани 39 ҷойи ифтихорӣ (2 медали тилло, 11 медали нуқра ва 26 медали биринҷӣ) ҷойи якум, ноҳияи Б. Ғафуров бо гирифтани 16 ҷойи ифтихорӣ (3 медали нуқра ва 13 медали биринҷӣ) ҷойи дуюм ва шаҳри Кӯлоб бо гирифтани 15 ҷойи ифтихорӣ (2 медали нуқра ва 13 медали биринҷӣ) ҷойи сеюмро ишғол намуданд. Хонандагони муассисаҳои таълимии ноҳияҳои Айнӣ, Ванҷ, Варзоб, Вахш, Дӯстӣ, Истаравшан, Левакант, Н. Хусрав, Панҷ, Панҷакент, Рашт , Рӯдакӣ, Темурмалик, Ховалинг, Хуросон, Ҳамадонӣ, Ҷ. Балхӣ, Ҷайҳун, Шаҳристон, Шаҳритус иштирок намуда, мутаасифона, сазовори ягон ҷойи ифтихорӣ нагардиданд. Шаҳру ноҳияҳои Балҷувон, Истиқлол, Ишкошим, Кӯҳистони Мастчоҳ, Қубодиён, Лахш, Мурғоб, Муъминобод, Нуробод, Роғун, Рушон, Сангвор, Тоҷикобод, Турсунзода дар умум иштирок накарданд.
Маросими ҷоизасупорӣ пас аз ҷамъбасти олимпиадаҳо барои хонандагони синфҳои дигар дар назар аст.

Маркази матбуоти
Вазорати маориф ва илми
Ҷумҳурии Тоҷикистон

Аз 27-ум то 30-юми апрели соли равон аз ҷониби Муассисаи давлатии “Маркази ҷумҳуриявии дарёфт ва рушди истеъдодҳо”-и назди Вазорати маориф ва илми Ҷумҳурии Тоҷикистон дар Муассисаи давлатии таълимии «Литсей-интернати Президентӣ барои кӯдакони болаёқати Ҷумҳурии Тоҷикистон» дар шаҳри Душанбе даври ҷумҳуриявии олимпиадаҳои фаннӣ барои хонандагони синфи 11 аз фанҳои ҷамъиятӣ-гуманитарӣ (олимпиада аз фанни забон ва адабиёти тоҷик ба номи Абӯабдуллоҳи Рӯдакӣ, олимпиада аз фанни забони русӣ ба номи Александр Пушкин, олимпиада аз фанни забони англисӣ ба номи Уилям Шекспир, олимпиада аз фанни забон ва адабиёти рус, олимпиада аз фанни забони давлатӣ, олимпиада аз фанни таърих ба номи Бобоҷон Ғафуров ва олимпиада аз фанни ҳуқуқ ба номи Куруши Кабир) баргузор гардид, ки дар он мутахассисони Маркази миллии тестии назди Президенти Ҷумҳурии Тоҷикистон ҷалб карда шуданд.
Дар олимпиадаҳои мазкур 1004 нафар хонандагони синфи 11-и муассисаҳои таҳсилоти умумии ҷумҳурӣ фаъолона иштирок намуданд, ки нисбат ба соли 2022 284 нафар (28,3%) зиёд аст. Дар озмун 173 нафар хонандагон сазовори ҷойҳои ифтихорӣ (6 нафар сазовори медали тилло, 54 нафар сазовори медали нуқра ва 113 нафар сазовори медали биринҷӣ) гардиданд.
Натиҷаи ҷамбасти даври ҷумҳуриявии олимпиадаҳои фаннӣ барои хонандагони синфҳои 11 муассисаҳои таҳсилоти умумии шаҳру ноҳияҳои ҷумҳурӣ аз фанҳои ҷамъиятӣ-гуманитарӣ нишон дод, ки хонандагони шаҳри Душанбе сазовори 70 ҷойи ифтихорӣ (6 медали тилло, 28 медали нуқра ва 36медали биринҷӣ), вилояти Суғд сазовори 46 ҷойи ифтихорӣ (11 медали нуқра ва 35 медали биринҷӣ, вилояти Хатлон сазовори 40 ҷойи ифтихорӣ (8 медали нуқра ва 32 медали биринҷӣ), шаҳру ноҳияҳои тобеи ҷумҳурӣ сазовори 7 ҷойи ифтихорӣ (2 медали нуқра ва 5 медали биринҷӣ) ва Вилояти Мухтори Кӯҳистони Бадахшон сазовори 10 ҷойи ифтихорӣ (5медали нуқра ва 5 медали биринҷӣ) гардиданд.
Натиҷаи ҷамъбасти озмун маълум намуд, ки хонандагони ноҳияи Сино бо гирифтани 31 ҷойи ифтихорӣ (2 медали тилло, 13 медали нуқра ва 16 медали биринҷӣ) ҷойи якум, ноҳияи Исмоили Сомонӣ бо гирифтани 17 ҷойи ифтихорӣ (1 медали тилло, 6 медали нуқра ва 10 медали биринҷӣ) ҷойи дуюм ва ноҳияи Данғара бо гирифтани 14 ҷойи ифтихорӣ (4 медали нуқра ва 10 медали биринҷӣ) ҷойи сеюмро сазовор гардиданд.
Хонандагони муассисаҳои таълимии ноҳияҳои Рошқалъа, Турсунзода, Ванҷ, Варзоб, Дӯстӣ, Қубодиён, Ёвон, Норак, Рашт, Сангвор, Хуросон, Абдураҳмони Ҷомӣ, Вахш, Муъминобод, Носири Хусрав, Файзобод, Ҷайҳун, Шаҳритус, Рушон, Дарвоз, Гулистон, Шаҳристон, Темурмалик, ва Панҷ сазовори ягон ҷойи ифтихорӣ нагардида, хонандагони муассисаҳои таълимии ноҳияҳои Балҷувон, Кӯҳистони Мастчоҳ, Мурғоб, Истиқлол, Нуробод ва Тоҷикобод дар умум иштирок накарданд.
Маросими ҷоизасупорӣ пас аз ҷамъбасти олимпиадаҳо барои хонандагони синфҳои дигар дар назар аст.
Маркази матбуоти
Вазорати маориф ва илми
Ҷумҳурии Тоҷикистон

Субҳи имрӯз дар Муассисаи таълимии давлатии “Летсей-интернати Президентӣ барои кӯдакони болаёқати Ҷумҳурии Тоҷикистон” дар ноҳияи Синои шаҳри Душанбе даври ҷумҳуриявии олимпиадаҳои фанҳои ҷамъиятӣ-гуманитарӣ миёни хонандагони синфи 11-и муассисаҳои таҳсилоти умумии кишвар оғоз гардид. Дар он муовини вазири маориф ва илми Ҷумҳурии Тоҷикистон Зиёдулло Абдулзода, директори Маркази миллии тестии назди Президенти Ҷумҳурии Тоҷикистон Сабзалӣ Ҷаъфарзода, сардори Сарраёсати маорифи шаҳри Душанбе Баҳром Исмоилзода, директори Маркази ҷумҳуриявии дарёфт ва рушди истеъдодҳо Нусратулло Саломиён, директори Летсей-интернати Президентӣ барои кӯдакони болаёқати Ҷумҳурии Тоҷикистон Ғайратзода Лайло Диловар, намояндагони раёсату шуъбаҳои маориф, омӯзгорону волидон ва хонандагон иштирок намуданд.

Нахуст Зиёдулло Абдулзода иброз дошт, ки соҳаи маориф дар сиёсати Ҳукумати Ҷумҳурии Тоҷикистон афзалиятнок пазируфта шудааст. Яке, аз ҳадафҳое, ки Вазорати маориф ва илми Ҷумҳурии Тоҷикистон пеш гирифтааст, баланд бардоштани сифати таҳсилот, рушди ҳаракати олимпӣ ва дар ин замина омода намудани кадрҳои боистеъдод барои бозори меҳнати дохилӣ ва байналмилалӣ мебошад. Имрӯз дар олимпиадаи мазкур хонандагоне роҳхат гирифтаанд, ки миёни ҳамсолони худ дар фанҳои алоҳида беҳтаринҳо ба шумор мераванд.
Сипас, вобаста ба суолҳои иштирокчиён директори Маркази ҷумҳуриявии дарёфт ва рушди истеъдодҳо Нусратулло Саломиён баромад карда, хонандагонро бо шартҳо ва тартиби баргузории олимпиада шинос намуд.
Баъди маросими ифтитоҳӣ хонандагон вобаста ба фанҳо ба гурӯҳҳо ҷудо шуда, донишу маҳорати худро нишон дода истодаанд.
Маврид ба зикр аст, ки дар олимпиадаи мазкур 1006 нафар хонандагони синфи 11 аз муассисаҳои таҳсилоти умумӣ аз фанҳои ҷамъиятӣ-гуманитарӣ (забон ва адабиёти тоҷик, забони русӣ, забони давлатӣ, забони англисӣ, ҳуқуқ, таърих) иштирок намуда, олимпиадаҳо бо ҷалби мутахассисони Маркази миллии тестии назди Президенти Ҷумҳурии Тоҷикистон баргузор гардида истодааст.
Натиҷаи олимпиада санаи 30-уми апрел эълон мегардад.

Аз ҷониби Корхонаи воҳиди давлатии «Шаҳри ҳушманд»-и (Smart City) Мақомоти иҷроияи ҳокимияти давлатии шаҳри Душанбе дар соли таҳсили 2022-2023 дар 105 муассисаи таълимии шаҳри Душанбе бо фарогирии  203 ҳазору 444 хонанда барномаи электронии «eDonish» фаъол гардонида шудааст. Тариқи он барои хонандагон қариб 17 миллион баҳогузорӣ ва барои волидайн қариб 162 ҳазор  саҳифа (аккаунт) кушода шудааст, иттилоъ доданд аз Сарраёсати маорифи шаҳри Душанбе.

Ба иттилои сардори Раёсати муассисаҳои томактабӣ ва миёнаи умумии Сарраёсати маорифи шаҳри Душанбе Асомиддин Бобозода, барномаи мазкур бо ташаббуси созанда ва навоваронаи Раиси шаҳри Душанбе муҳтарам Рустами Эмомалӣ дар партави дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади ҷорӣ намудани низоми муосири иттилоотӣ дар муассисаҳои таълимии шаҳри Душанбе бо истифода аз технологияҳои иттилоотию коммуникатсионӣ, таъмини мунтазами ҳамкории муассисаҳои таълимӣ бо оилаю аҳли ҷомеа ва дар ин замина баланд бардоштани самаранокии хизматрасонии давлатӣ дар соҳаи маориф ба шаҳрвандон таҳияву амалӣ гардидааст.

Барномаи «eDonish»  хизматрасонии электронӣ мебошад, ки тавассути он волидони хонандагони муассисаҳои таълимӣ аз ахлоқу рафтор ва пешрафти донишомӯзии фарзандони худ бо истифода аз воситаҳои иттилоотиву коммуникатсионии муосир ва гирифтани паёмакҳо ба телефонҳои ҳамроҳ ба таври доимӣ бохабар мешаванд.

Ин барнома ҳамчунин шомили унсурҳои мухталифи иттилоотӣ, аз ҷумла журнал ва рӯзномаи электронӣ, ҷадвали дарсҳои асосӣ ва иловагӣ, назорати давомоти хонандагон ва мониторинги сатҳи дониши онҳо мебошад.

Бояд тазаккур дод, ки соли таҳсили 2022-2023 теъдоди муассисаҳои таҳсилоти умумӣ дар ҷумҳурӣ ба 3967 расида, шумораи умумии хонандагон дар онҳо ба 2 миллиону 232 ҳазору 114 нафар расидааст. Аз ин теъдод 199 муассисаи таҳсилоти миёнаи умумӣ дар пойтахт фаъолият дошта, дар онҳо 274 ҳазору 920 хонанда таҳсил менамояд.

Ба иттилои Раёсати маорифи шаҳри Душанбе таҳлили фаъолияти барнома самаранокии татбиқи онро дар самти баланд бардоштани сатҳу сифати дониши хонандагон ва назорати пурзӯри раванди таълиму тарбияи насли наврас нишон медиҳад.

Чунончи, барномаи мобилии «eDonish»-ро дар телефонҳои «android» ва «ios» зиёда аз 22 000 нафар боргирӣ намудаанд. Ҳамзамон барои 161 855 волидайн саҳифа (аккаунт) кушода шуда, аз сентябри соли 2022  12 ҳазор волидайн аз барнома фаъолона истифода мебаранд. Шумораи паёмакҳои фиристода ба телефони ҳамроҳи волидон дар марҳилаи дуюм ба 80 000 адад баробар гашт. Дар чоряки дуюм нисбат ба чоряки якум 2 миллиону 322 ҳазору 521 баҳо ё худ 52,7% бештар баҳо гузошта шуд. Баъд аз гузаронидани таҳлили дуюм ва мушаххас намудани камбудиҳои ҳамаи муассисаҳо фаъолнокии истифодаи барнома 2,4 маротиба афзуд.

Бояд тазаккур дод, ки ба таълиму тарбия фаро гирифтани насли наврасу ҷавон ҳамеша дар мадди назари Давлату Ҳукумат қарор дошта, маҳз ба хотири баланд бардоштани маърифати ин қишри ҷомеа ҳанӯз 2 августи соли 2011 Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» қабул гардид.

Дар доираи он аз ҷониби масъулин дар муассисаҳои таҳсилоти миёнаву олии мамлакат пайваста бо толибилмону донишҷӯён суҳбату вохӯриҳо гузаронида мешавад, ки ин аз амалишавии қонуни мазкур гувоҳӣ медиҳад.

Ҳадафи қонуни мазкур баланд бардоштани масъулияти падару модар дар таълиму тарбияи фарзанд, тарбияи худшиносию худогоҳӣ, ватандӯстӣ, эҳтиром ба арзишҳои миллию умумибашарӣ, риояи меъёрҳои одобу ахлоқи ҳамида ва ба роҳи дуруст равона  намудани фарзандон мебошад.

Манбаъ: https://khovar.tj/2023/04/edonish-dar-dushanbe-bo-ma-sadi-amkorii-zichi-muassisa-oi-talim-bo-oilayu-...

Рӯзҳои 14-16-уми апрели соли равон аз ҷониби Муассисаи давлатии “Маркази ҷумҳуриявии дарёфт ва рушди истеъдодҳо”-и назди Вазорати маориф ва илми Ҷумҳурии Тоҷикистон дар Муассисаи давлатии таълимии «Мактаби байналмилалии Президентӣ» дар шаҳри Душанбе даври ҷумҳуриявии олимпиадаҳои фаннӣ барои хонандагони синфи 11 аз фанҳои табиӣ-риёзӣ (олимпиада аз фанни физика (астрономия) ба номи Абурайҳони Берунӣ, олимпиада аз фанни математика ба номи Умари Хайём, олимпиада аз фанни биология ба номи Абӯалӣ ибни Сино, олимпиада аз фанни химия ба номи Закариёи Розӣ, олимпиада аз фанни география ба номи Носири Хусрав ва олимпиада аз фанни технологияи иттилоотӣ ба номи Ал-Хоразмӣ) баргузор гардид, ки дар он мутахассисони Маркази миллии тестии назди Президенти Ҷумҳурии Тоҷикистон ҷалб карда шуданд.
Дар олимпиадаҳои мазкур 859 нафар хонандагони синфи 11-и муассисаҳои таҳсилоти умумии ҷумҳурӣ фаъолона иштирок намуданд, ки нисбат ба соли 2022 252 нафар (29,3%) зиёд аст. Дар озмун 219 нафар хонандагон сазовори ҷойҳои ифтихорӣ (19 нафар сазовори медали тилло, 31 нафар сазовори медали нуқра ва 169 нафар сазовори медали биринҷӣ) гардиданд.
Натиҷаи ҷамбасти даври ҷумҳуриявии олимпиадаҳои фаннӣ барои хонандагони синфҳои 11 муассисаҳои таҳсилоти умумии шаҳру ноҳияҳои ҷумҳурӣ аз фанҳои табиӣ-риёзӣ нишон дод, ки хонандагони шаҳри Душанбе сазовори 80 ҷойи ифтихорӣ (9 медали тилло, 13 медали нуқра ва 58 медали биринҷӣ), вилояти Суғд 58 ҷойи ифтихорӣ (6 медали тилло, 12 медали нуқра ва 40 медали биринҷӣ, вилояти Хатлон 48 ҷойи ифтихорӣ (1 медали тилло, 6 медали нуқра ва 41 медали биринҷӣ), шаҳру ноҳияҳои тобеи ҷумҳурӣ 30 ҷойи ифтихорӣ (3 медали тилло ва 27 медали биринҷӣ) ва Вилояти Мухтори Кӯҳистони Бадахшон 3 ҷойи ифтихорӣ (3 медали биринҷӣ) гардиданд.
Натиҷаи ҷамъбасти озмун маълум намуд, ки хонандагони ноҳияи Сино бо гирифтани 46 ҷойи ифтихорӣ (5 медали тилло, 6 медали нуқра ва 35 медали биринҷӣ) ҷойи якум, ноҳияи Исмоили Сомонӣ бо гирифтани 19 ҷойи ифтихорӣ (1 медали тилло, 4 медали нуқра ва 14 медали биринҷӣ) ҷойи дуюм ва ноҳияи Данғара бо гирифтани 17 ҷойи ифтихорӣ (2 медали нуқра ва 15 медали биринҷӣ) ҷойи сеюмро сазовор гардиданд. Хонандагони муассисаҳои таълимии ноҳияҳои Рошқалъа, Турсунзода, Фархор, Левакант, Абдураҳмони Ҷомӣ, Вахш, Истаравшан, Муъминобод, Носири Хусрав, Файзобод, Бӯстон, Ҷайҳун, Шаҳритус, Рушон, Дарвоз, Гулистон, Шаҳристон, Кӯҳистони Мастчоҳ, Темурмалик, Балҷувон ва Ишкошим сазовори ягон ҷойи ифтихори нагардида, хонандагони муассисаҳои таълимии ноҳияҳои Истиқлол, Қубодиён, Роғун, Нуробод, Сангвор, Тоҷикобод, Лахш ва Мурғоб дар умум иштирок накарданд.
Маросими ҷоизасупорӣ ба ғолибони олимпиадаҳои мазкур пас аз ҷамъбасти олимпиадаҳо аз фанҳои гуманитарӣ дар назар аст.

Маркази матбуоти
Вазорати маориф ва илми
Ҷумҳурии Тоҷикистон